Kuqi, gol për 31-vjetorin dhe shpëton Finlandën

Albania Sport - Gjashtë minuta lojë iu deshën shqiptarit me pasaportë finlandeze, 31-vjeçarit Shefki Kuqi (i mbushi, më 10 nëntor), për të realizuar golin e fitores për Finlandën në ndeshjen e vlefshme për grupin A. Edhe pse hyri si zëvendësues në takimin Finlandë-Azerbajxhan (2-1), Kuqi me golin e tij në minutën e 86-të i dha një fitore e ngushtë të Finlandës në shtëpi.
Finlanda e Roj Hodgson dominoi takimin, por ajo u shokua nga goli i Makhmud Gurbanovit, i cili shënoi në minutën e 63-të. Majkëll Forsell barazoi rezultatin në minutën e 79-të.
“Shqiptari fluturues”, siç thirret sulmuesi i Fulhamit në Premier League (i huazuar nga Crystal Palace) realizoi golin e fitores pas goditjes së lirë të ekzekutuar nga Litmanen (edhe ky një zëvendësues).
Kuqi është i njohur si sulmues i fuqishëm dhe aftësitë teknike. Me fanellën e Finlanës ai ka zhvilluar 53 ndeshje dhe goli kundër Azerbajxhanit ishte shtati. Finlanda do të përballet me Spanjën më 21 nëntor.

Bravo Shefki Kuqi se eshte njesh, e kam pare dhe ne Uk dhe eshte tamam Shqiptar dhe njerez si ai na duhen ne kombetaren tone, mos harro se ka dhe nje vella tjeter qe po behet lojtar fantastik. Edhe njehere bravo Shefki.

Oto Bariç, lamtumirë e hidhur nga Shqiperia


Rumani-Shqipëri 6-1, por dhe vendi i pestë në grup, kur gjashtë ditë më parë endërronim me arrogancë të katërtin. Gjithsesi një rikthim i hidhur në realitet. Në atë shqiptar. Që me prapaskenat e tij “gëlltiti” edhe një nga legjendat e trajninut botëror. Oto Bariç nuk mundi të duronte më. Tekniku më karizmatik i huaj që ka drejtuar Shqipërinë dha dorëheqjen pas dy humbjeve jo vetëm poshtëruese, por edhe me intriga të mëdha brenda. Bariç u turpërua në ndeshjen e 100-të tij si trajner i tri ekipeve kombëtareve (Kroacisë, Austrisë dhe Shqipërisë) që kroati 75-vjeçar ka drejtuar gjatë karrierës së tij të gjatë si trajner. Ndeshja me Rumaninë ishte edhe 100-ta, por edhe më e dhimbshmja gjatë për të. Oto nuk do ta kishte menduar kurrë se do të ndahej me një humbje të tillë nga Shqipëria. Kjo humbje kaloi edhe përmasat e asaj të pësuar nga Shqipëria e Agron Sulaj (5-1) në eliminatoret e Euro 1988. Më keq se kaq nuk ka ka të shkojë.
PJESA E PARË - Gjithçka filloi për rumunët, kur në minutën e 6-të, Dika ekzekutoi një goditje të lirë ballore nga rreth 20 metra , por Beqaj pret pa probleme. Duro gjuajti befasisht nga distanca pesë minuta më pas, duke paralajmëruar portierin rumin Lobonc. Sërish Shqipëria në të 17’: goditje e lirë qendrore, krosoi Duro, Bogdani bëri torrën me kokë, por Dede ishte shumë larg për të përfituar përballë portës. Goli rumun është i shpejtë. Minuta e 22-të dhe Rumania në epërsi. Aksion nga e djathta, pasim në zonë, topi kalon qetësisht para Currit e Dedes që çuditërisht nuk janë në gjendje ta largojnë dhe Dika e shtyn në portë, i pashqetësuar nga askush, vetëm pak metra larg Beqajt. Rumunët kryesojnë 1-0.
Në të 27’ Haxhi rrëmbeu një top nga mbrojtja rumune dhe shërben te Skela në zonë, gjuajtje me të majtën, por Lobonc shpëtoin portën. Mundësi shumë e mirë e Shqipërisë për të barazuar. Rasti tjetër për kuqezinjtë vjen në minutën e 36-të. Lala depërtoi drejt zonës, pasoi bukur prapa te Skela, gjuajtje e fortë e këtij të fundi dhe topi u ndal nga traversa. Shqipëria është e pafat. Minuta e 40-të. Aksion fantastik i Shqipërisë, Bulku nga e djathta pasoi te Duro, gjuajtje fluturimthi e mesfushorit të Tiranës, por i tillë është edhe grushtimi i Lobonc, që shpëton mrekullisht portën. Pjesa e parë u mbyll 1-0, për të përgatitur furtunë në 45 minutat e dyta.
PJESA E DYTË- Në të 54’ Tamash shënoi golin e dytë për Rumaninë, me një goditje të lirë rrafsh me tokën. Disi me vonesë hedhja e Beqajt, që nuk mundi të dalë topin. Rumania kryeson 2-0. Minuta e 60-të e lë Shqipërinë me dhjetë lojtarë. Curri morri kartonin e dytë të verdhë, pas një ndërhyrje nga pas. Një minutë më pas erdhi dhe goli i tretë i rumunëve. Në të 61’ Nikulae shënoi i lirë vetëm dy metra larg portierit Beqaj. Mbrojtja shqiptare është totalisht e shthurur, 3-0 për Rumaninë.
I vetmi moment nderi është ai i minutës së 62-të, kur Kapllani shkurtoi diferencën për Shqipërinë, me një gjuajtje bombë në mes të zonës rumune. Kuqezinjtë reduktojnë përmasat e humbjes, 3-1. Por gëzimi i golit për Kapllanin nuk zgjati shumë. Dy minuta më pas Rumania shënoi golin e katërt. Aksion nga e djththa, pasim brenda zonës dhe Nikulae shënoi i ndihmuar edhe nga dalja e gabuar të Beqajt, 4-1. Minutat e mbetura janë një ferr i vërtetë, ku brenda dy minutash fitojnë dy penallti. Në të 68’ pas një ndërhyrjeje të gabuar të Lilës, Marika nuk gaboi nga pika e bardhë duke shënuar golin e pestë (5-1) për Rumaninë, dhe dy minuta më pas, në të 70’, ndërhyrje e gabuar e Dedes në zonë, solli edhe penalltinë e dytë dhe kartonin e kuq për mbrojtësin e Tiranës. Shqipëria mbeti me nëntë lojtarë, ndërsa Dika nga pika e bardhë shënoi golin e gjashtë. Shqipëria shkatërrohet, 6-1. Në të 82’ një moment i mirë për Shqipërinë. Bogdani mbrojti mirë topin brenda zonës dhe gjuajt, por Lobonc grushtoi. Provoi edhe Kapllani por mbrojtja rumune largoi topin. Minuta e fundit (90’) sjell zëvendësuesin Mazilu pranë golit të shtatë, por nuk arrin të shtyjë topin në rrjetë. Pas pak sekondash, gjyqtari kroat i dha fund tmerrit, duke sinjalizuar fundin e takimit.
RUMANI-SHQIPËRI 6-1
Shënues: Dika 22’, 73’ (pen), Tamash 53’, Nikulae 64’, 66’, Marika 71’ (pen)/ Kapllani 65’
E mërkurë, 21 nëntor 2007, stadiumi “Lia Manoliu”, Bukuresht
Rumania: Lobont; Ogararu, Tamas (78’ Konstantin), Goian, Raç, F.Petre (65’ Bukur), Margaritesku, Kocis, Nikulae, Marika (73’ Mazilu), Dika. Trajner: Viktor Picurka
Lojtarë të papërdorur: Koman, O.Petre, Marin, Trika
Shqipëria: Beqaj, Curri, Dede, Vangjeli (40’ Kapllani), Lila, Haxhi, Lala, Bulku, Duro, Skela (78’ Hyka), Bogdani (82’ Bakaj)
Trajner: Slavko Kovaçiç
Lojtarë të papërdorur: Hidi, Rustemi, Bushi, Salihi
Kartonë të verdhë: Marika/ Vangjeli, Dede
Kartonë të kuq: Curri (61’), Dede (71’)
Gjyqtarë: Trivkoviç, Novesel, Dujela (të gjithë nga Kroacia)
Ndeshjet e fundit
Rumani-Shqipëri 6-1
Bjellorusi-Holandë 2-1
Slloveni-Bullgari 0-2
RENDITJA PERFUNDIMTARE
Rumania 12 29
Holanda 12 26
Bullgaria 12 25
Bjellorusia 12 13
Shqipëria 12 11
Sllovenia 12 11
Luksemburgu 12 3

Humbjet e mëdha të Shqipërisë

Kjo me Rumaninë nuk është e para që Shqipëria humbet dukë pësuar 6 gola. Statistikat e Kombëtares ofrojnë në fakt edhe rezultate më të thella. Përfaqësuesja e drejtuar nga Agron Sulaj është mundur në Spanjë me rezultatin e thellë 9-0, më 19 dhjetor 1990, në takimin e luajtur në Sevilje të Spanjës, i vlefshëm për eliminatoret e Kampionatit Europian 1992. Edhe Shqipëria e Loro Boriçit ka pësuar një humbje shokuese me Gjermaninë në Dortmund: 8-0, më 18 nëntor 1981, në ndeshjen e vlefshme për kualifikueset e Kampionatit Botëror 1982. Legjenda Boriçi ka pësuar edhe një tjetër humbje të hidhur 6-0 me Gjermaninë, po në Dortumund, më 8 prill 1967. Humbja më e thellë historikë është ajo me Hungarinë 12-0, më 24 shtator 1950, por për fat të mirë ajo ishte thjesht një miqësore. Franca na ka shkaktuar një tjetër humbje 5-0, më 30 mars 1991 për elimiantoret e Euro 1992, kur kuqezinjtë i drejtonte Bejkush Birçe. Në eliminatoret e Kampionatit Botëror 1990, Shqipëria e drejtuar nga Shyqyri Reli u mund 5-0 nga Anglia, më 26 maj 1989. Edhe Austria na ka mundur 5-0, më 22 shtator 1982, kur në bankinë ishte po Rreli.

Presidenti Duka falenderon Baricin pas largimit

Nje ore pas ndeshjes me Rumanine ku perfaqsuesja Shqiptare u mund thellesisht , Otto Baric i ka komunikuar Presidentit te FSHF-se Armand Duka doreheqjen nga posti i trajnerit te ekipit.
Vete Baric ka sqaruar se arsyeja per te cilen jep doreheqjen eshte se skuadra ne dy ndeshjet e fundit ka zhvilluar loje te dobet duke i shkaktuar atij mjaft shqetesim .Duke pare gjendjen e skuadres ne keto dy ndeshje ai u shpreh se nuk eshte ne gjendje te drejtoje skuadren dhe se nuk e ndjen veten te forte per te vazhduar punen me kombetaren kuqezi.
Presidenti Duka pasi ka marre komunikimin e dorehqejes se z.Baric me keqardhje dhe me mirekuptim e ka pranuar kete levizje te teknikut kroat.
Z.Duka ne emer te Komitetit Ekzekutiv te FSHF-se ka falenderuar trajnerin i cili ne kete sezon arriti qe ti jap nje imazh te ri skuadres kombetare duke bere nje paraqitje pozitive ne eleminatoret e EURO 2008 si dhe duke bere gradualisht rinovimin e skuadres me lojtare te rinj.

Bariç jep dorëheqjen në ndeshjen e 100-të

Kthim në realitet. Bariç nuk mundi të duronte më. Tekniku më karizmatik që ka drejtuar Shqipërinë dha dorëheqjen pas dy humbjeve jo vetëm poshtëruese, por edhe me intriga të mëdha brenda. Bariç turpërohet në ndeshjen e 100-të tij si trajner i tri ekipeve kombëtareve që kroati 75-vjeçar ka drejtuar gjatë karrierës së tij të gjatë si trajner. Ndeshja me Rumaninë ishte edhe 100-ta, por edhe më e dhimbshmja gjatë për të. Oto nuk do ta kishte menduar kurrë se do të ndahej me një humbje të tillë nga Shqipëria.

Rezultatet e Shqipërisë
në Euro 2008
SHQIPËRIA ME BARIÇIN

Miqësore
17 gusht 2006
San Marino- Shqipëri 0 - 3
7 shkurt 2007
Shqipëri- Maqedoni 0 - 1
26 maj 2007
Angli - Shqipëri 3 - 1
22 gusht 2007
Shqipëri-Maltë 3 - 0

Zyrtare
2 shtator 2006
Bjellorusi- Shqipëri 2 - 2
6 shtator 2006
Shqipëri- Rumani 0 - 2
11 tetor 2006
Holandë- Shqipëri 2 - 1
24 mars 2007
Shqipëri - Slloveni 0 - 0
28 mars 2007
Bullgari - Shqipëri 0 - 0
2 qershor 2007
Shqipëri-Luksemburg 2 - 0
6 qershor 2007
Luksemburg- Shqipëri 0 - 3
2 qershor 2007
Shqipëri-Luksemburg 2 - 0
6 qershor 2007
Luksemburg- Shqipëri 0 - 3
12 shtator 2007
Shqipëri-Holandë 0 - 1
13 tetor 2007
Slloveni- Shqipëri 0 – 0
17 tetor 2007
Shqipëri-Bullgari 1 - 1
17 nëntor 2007
Shqipëri-Bjellorusi 2 – 4
21 nëntor 2007
Rumani-Shqipëri 6-1

Shqipëria humbet me Greqinë, Sukaj tjetër gol

Shqipëria U-21 edhe pse u mposht me vështirësi në “Apostolodhos Nikolaidhis” me rezultatin e ngushtë 2-1 me Shpresat e Greqisë la një përshtypje shumë të mirë, në ndeshjen e shtatë të saj për eliminatoret e Kampionatit Europian 2009. Sulmuesi Xhevair Sukaj shënoi golin e barazimit të përkohshëm 1-1 në minutën e 38-të, duke vendosur ekulibrat në fushë pas golit të realizuar me penallti nga na e Hristodopulos (28’). Për shkodranin ku është goli i tij i katërt në kualifikuese, pas 3 golave kundër Ishujve Faroe katër ditë më parë. Pjesa e parë u mbyll e barabartë, ndërkohë që në pjesën e dytë, Kosta Mitroglu me golin e tij në minutën e 54-t i dha fitoren Greqisë U-21, për ta ngjitur në vendin e tretë me 13 pikë, tre më shumë se Shqipëria (10).
Gjatë takimit gjyqtari Banari (Moldavia) ndëshkoi me karton të verdhë Sukajn, Arifaj dhe Progrin.
Shtypi grek ishte kritik për paraqitjen e vafër të përfaqësues helene. Grupin I kryeson Italia me 19 pikë (7 ndeshje), që fitoi me rezultatin e ngushtë 0-1 me Ishujt Faroe në transfertë. Edhe Kroacia e vendit të dytë fitoi po 0-1 në Azerbajxhan.
Trajneri i Shpresave, Artan Bushati u shpreh për faqen zyrtare të Federatës Greke të Futbollit, epo.gr: “Ndeshja nuk pati rezultatin që dëshironim. Kishim disa lojtarë që nuk ishin në formë në ndeshjen e sotme. Falënderojmë federatën greke për pritjen miqësore të saj dhe në Shqipëri do të bëjmë të gjitha përpjekjet për të bërë të njëjtën gjë”.
Nga ana e tij trajneri i Greqisë U-21, Nikos Nioplas u shpreh pas ndeshjes: “Rezultati i takimit ishte i drejtë. Në pjesën e parë përpjekjet tona nuk u konkluduan. Në pjesën e dytë ishim më mirë. Kundërshtari kishte një ekip të mirë dhe bëri një një ndeshje të madhe. Patëm pak frikë për ndeshjen, kjo e ndikuar edhe nga humbja me Kroacinë. Për fat të mirë patëm një fund të lumtur”.
Greqia U-21-Shqipëria U-21 2-1
Shënues: Hristodopulos 28’ (p), Mitroglu 54’/ Sukaj 38
Greqia: Panagopulos, Maniatsis, Moniakis, Papastopoulos, Rika, Dhimutsos (46’ Petropoulos), Iliadhis, Hristodhulopulos (91’ Plusis), Aravadhis (81’ Marinas), Mitroglu. Trajner: N.Nioplas
Shqipëria: Koliqi, Arapi, Guga, Arifaj, Abilaliaj (58’ Kani), Malindi (85’ Zeqiri), Sefa, Sukaj (91’ Vila), Lika, Progri, Fagu. Trajner; A.Bushati
U-21, Grupi 1
Azerbajxhan-Kroaci 0-1
Ishujt Faroe-Itali 0-1
Greqi-Shqipëri 2-1
RENDITJA
Italia 7 19
Kroacia 8 18
Greqia 7 13
SHQIPËRIA 7 10
Ish.Faroe 8 3
Azerbajxhani 7 1
Në fazën e plej-ofit kalojnë 10 ekipet e para të grupeve dhe katër vendet më të mira të dyta.

Historia kundër kuqezinjve, me Rumaninë 8 humbje rresht


Rumania e futbollit nuk është një kundërshtar i panjohur për Shqipërinë. Të dyja përfaqësueset janë ndeshur plot 12 herë midis tyre që nga përballja e parë para 61 vjetësh. Një bilanc aspak optimist për Shqipërinë, ka fituar 2 ndeshje, barazuar 1, teksa kemi pësuar 10 humbje (8 rresht), e fundit më 6 shtator 2007. Kjo e së mërkurës është e 13-ta midis dy ekipeve, ku trajneri Oto Bariç do të jetë trajneri i 8-të që do të ndeshet me një kombëtare rumune, por që brenda saj ka një të veçantë për kolegun e tij. Viktor Picurka është autori i një goli kundër Shqipërisë në ndeshjen për eliminatoret e Kampionatit Europian, më 25 mars 1987 në Bukuresht, ku pësuam një humbje të thellë 5-1.
1946 -Ndeshja e parë midis dy ekipeve daton më 13 tetor 1946, kur Shqipëria fitoi 1-0 me golin e të madhit Qamil Teliti në finalet e Kampionatit Ballkanik të fituar nga Shqipëria (i vetmi trofe ndërkombëtar).
1947 - Pas këtij triumfi të vogël, më 25 maj 1947, Shqipëria do të shkatërrohej më shtatë muaj më pas po në kryeqytetin shqiptar nga Rumania me rezultatin e thellë 4-0, po për Kampionatin Ballkanik, ku rumuni Iiliu Farkas shënoi plot tri herë në portën e mbrojtur nga Alfred Bonati.
1948 - Befasisht, gati një vit më pas, më 2 maj 1948, Pal Mirashi do të ripërsëriste fitoren 1-0 atje dhe ku vetë rumunët nuk e prisnin, në kryeqytetin e tyre, Bukuresht, në stadiumin “Giuleshti”, në prani të 20 mijë shikuesve. Këmba e artë e Pal Mirashit sigloi fitoren e dytë kundër Rumanisë në një ndeshje për Kampionatin e Europës Juglindore, një lloj kampionati ballkanik.

1949 - Ndeshja e katërt midis dy ekipeve, e zhvilluar me 23 tetor 1949, përfundoi në barazim 1-1, ku Qamil Teliti (50’) barazoi pjesën e dytë golin e shënuar nga kapiteni rumun, Josif Petçovski (23’). Një ndeshje e ndjekur nga 40 mijë shikues në stadiumin “Republicci”. Më 29 Nëntor 1949, në Ditën e Çlirimit të Shqipërisë, Shqipëria do të humbiste 4-1 miqësoren me Rumaninë, ku ishte sërish Pal Mirashi që do të shënonte golin e vetëm përballë katër të rumunëve me autorë Iion Lungun (2) dhe Stefan Filoti e George Vazcki nga një.
1950 - Vit i rezultatit më të thellë të pësuar nga Rumania, 6-0, nga të cilët plot pesë gola vetëm në pjesën e parë: Josif Petçovski (2), Andrei Radulesku (2), Andrea Merçea (1) dhe Ioan Suru (1) ishin autorë të golave.
1972- Takimet midis dy vendeve rifillojnë pas 22 vitesh, kur Shqipëria do të humbiste 2-0 në Bukuresht, më 29 tetor 1972, për eliminatoret e Kampionatit Botëror. Dy gola të pësuar qysh në pjesën e parë dhe brenda tri minutash nga Nikolae Dobrin (38’) dhe Emerih Dembrovski (41’).
1973 - Ndeshja e kthimit e zhvilluar në Shqipëri, më 6 maj 1973, ishte edhe më e trishtuar. Rumania fitoi në Tiranë 4-1, ku Sabah Bizi shënoi golin e nderit për Shqipërinë në minutën e 85-të, kur rumunët kryesonin me rezultatin 4-0, me gola të shënuar nga Ion Dumitru, dy gola nga Florea Dumitrake (1 me penallti) dhe Teodor Taralunga.

1987 - Rumania zhduket për gati 25 vjet nga skena e futbollit shqiptar, për t’u ritakuar për eliminatoret e Kampionatit Europian, më 25 mars 1987 në Bukuresht, ku pësuam një humbje të thellë 5-1. Golin e parë kundër Shqipërisë e pat shënuar trajneri i sotëm i Rumanisë, Viktor Picurka, qysh në minutën e dytë të takimit. Shkëlqim Muça barazoi 1-1, por më pas erdhi furia rumune me 4 gola të tjerë: Ladislau Boloni, George Haxhi, Miodrag Belodedici dhe Adrian Bumbesku. Ndeshja e kthimit më 28 tetor 1987 u zhvillua në Vlorë dhe humbja ishte të paktën dinjitoze 1-0. Golin e vetëm të takimit e shënoi rumuni Mikael Klein.
1988 - Një ndeshje miqësore, por e humbur thellësisht 3-0. Miodrag Belodedici, George Haxhi dhe Rodion Kamataru. Një ndeshje pa koment për trajnerin Shyqyri Reli.
2006 - Kaluan plot 18 vjet nga ndeshja e fundit me Rumaninë dhe shumë gjëra kanë ndryshuar në historinë e dy ekipeve. Shqipëria barazoi në Bjellorusi 2-2, Rumania barazoi në shtëpi me Bullgarin 2-2, por kur të dy skuadrat u përballën, më 6 shtator në Tiranë, fitoi Rumania 2-0. Goli i parë u shënua nga Dika dhe tjetri nga Adrian Mutu me penallti.
2007 - Kjo e së mërkurës, e vlefshme për kualifikueset e Euro 2008-s, është e 14-ta midis dy ekipeve. Rumania është tashmë e kualifikuar dhe lufton për vendin e parë në grup, ashtu si dhe Holanda (të dyja kanë nga 26 pikë), ndërsa Shqipëria për të humbur vendin e katërt.
Muça, golashënuesi i fundit
Shkëlqim Muça është golashënuesi i fundit shqiptar që ka shënuar në portën e Rumanisë, pikërisht në ndeshjen e luajtur në Rumani për eliminatoret e Kampionatit Europian 1988, ku humbëm me rezultatin e thellë 5-1 me Kombëtaren rumune të drejtuar nga Emerik Jenei. Autorët e tjerë të golave shqiptarë janë Qamil Teliti (autori i goli të parë historik kundër Rumanisë), Pal Mirashi (2 gola), Sabah Bizi.

TË GJITHA NDESHJET
SHQIPËRI-RUMANI

1. 13.10.1946
Shqipëri-Rumani 1-0
(Kamp. Ballkanik)-
Tr.: Ljubosha Broçiç

2. 25.05.1947
Shqipëri-Rumani 0-4
(Kamp. Ballkanik)
Tr.: Adem Karapici

3. 02.05.1948
Rumani-Shqipëri 0-1
Kamp. Ballkanik)
Tr.: Adem Karapici

4. 23.10.1949
Rumani-Shqipëri 1-1
(Kamp. Ballkanik)
Tr.: Sllave Llambi

5. 29.11.1949
Shqipëri-Rumani 1-4
(Miqësore)
Tr.: Ludovik Jakova

6. 05.10.1950
Rumani-Shqipëri 6-0
(Miqësore)
Tr.: Ludovik Jakova

7. 29.10.1972
Rumani-Shqipëri 2-0
(El. Botërorit 1974)
Tr.: Myslim Alla

8. 06.05.1973
Shqipëri-Rumani 1-4
(El. Botërorit 1974)
Tr.: Myslim Alla

9. 25.03.1987
Rumani-Shqipëri 5-1
(El. Euro 1988)
Tr.: Agron Sulaj

10. 28.10.1987
Shqipëri-Rumani 0-1
(El. Euro 1988)
Tr.: Agron Sulaj

11. 20.09.1988
Rumani-Shqipëri 3-0
(Miqësore)
Tr.: Shyqyri Reli

12. 06.09.2006
Shqipëri-Rumani 0-2
(El. Euro 2008)
Tr.: Oto Bariç

13. 21.11.2007
Rumani-Shqipëri 17:00
(El. Euro 2008)
Tr.: Oto Bariç

BILANCI
12 ndeshje
2 fitore Shqipëria
1 barazim
9 fitore Rumania
6-31 golat

Duka ëndërron milionat e Gjermanisë

FIFA publikoi renditjen e muajit nëntor të ekipeve kombëtare mbi bazën e të cilave janë përcaktuar edhe skuadrat që do të bëjnë pjesë në 6 vazot europiane për shortin e Kampionatit Botëror 2010, që do të hidhet të dielën në Afrikën e Jugut. Dy humbjet e muajit nëntor në eliminatoret e Euro 2008, ato me Bjellorusinë (2-4 në shtëpi) dhe Rumaninë (6-1 në Bukuresht) i kushtuan shtrenjtë Kombëtares shqiptare, duke e zbritur në vendin e 38-të në Europë dhe në vazon e pestë ose, siç njihet zyrtarisht nga FIFA, vazo “E”, në të njëjtën vazo ku ishim edhe gjatë shortit të Euro 2008, eliminatoret e të cilave sapo përfunduan.
“ËNDRRA GJERMANI” – Presidenti i Federatës Shqiptare të Futbollit, Armand Duka, i shoqëruar edhe nga përkthyesi Ajet Xeka, ndodhet prej ditës së enjte në Afrikën e Jugut. Bosi i FSHF-së gjatë ditëve të qëndrimit të tij në Durban është takuar me holologë të tij nga federatat europiane. “Presidenti e ka shfaqur dëshirën e tij për të pasur Gjermaninë në grup”, - thotë zëdhënësi i FSHF-së, Lysjen Nurishmi. “Pse preferon nga të mëdhatë Gjermaninë? Natyrisht se paguan më shumë para nga të drejtat televizive”, - shton ai. Gjermania, sipas Nurishmit, mund të paguajë për ndeshjen që do të luhet në Tiranë (nëse ajo bie në short) deri në 3 milionë euro. Gjatë fushatës së fundit kualifikuese për Euro 2008, FSHF-ja lidhi një kontratë në shumën 2.8 milionë euro me “Sportfive”, kompaninë që fitoi ankandin e të drejtave televizive të ndeshjeve të Kombëtares sonë, përpara se të hidhej shorti për eliminatoret e Kampionatit Europian.
STRATEGJIA E DUKËS – Bosi i FSHF-së është me profesion ekonomist dhe ka nuhatjen e një biznesmeni të suksesshëm, i cili merr edhe rrezikun përsipër. Pikërisht për këtë arsye, ai dhe Komiteti Ekzekutiv i FSHF-së vendosi për të mos i shitur të drejtat televizive përpara hedhjes së shortit të Botërortit por pas tij, pasi ai shpreson pikërisht të “peshkojë” kundërshtarë të mëdhenj dhe me financa të fuqishme si Gjermania, Anglia, Italia, Franca, që të katërta kundërshtare potenciale të kuqezinjve për Botërorin 2008. E drejta televizive nuk shitet ndeshje për ndeshje, por si paketë. FSHF-ja është duke menduar edhe për zëvendësimin e sponsorit teknik. Burime pranë FSHF-së pohuan se ka shumë mundësi që të zgjidhet kompania italiane “Diadora”. Aktualisht, sponsor është kompania angleze “Umbro”, ndërsa dy edicione më parë ka qenë ajo gjermane “Puma”. “Umbro” mbulon të gjitha veshjet sportive të Kombëtares dhe përfaqësueseve të vogla, ndërkohë që “Tramondi” furnizon kuqezinjtë me topa futbolli.
GRUSHTI BJELLORUS - Një muaj më parë renditeshim në vendin e 34-t (dhe teorikisht në vazon e katërt) duke pasur pas vetes Gjeorgjinë (35), Maqedoninë (36). Ndërkohë që me renditjen e nëntorit, që merret edhe bazë për hedhjen e shortit të Botërorit, jemi në të 38-in (- 4 vende), katër vende më pas, ndërkohë që e gjejmë veten pas Gjeorgjisë, ndërsa Maqedonia, që u drejtua gjatë fushatës nga slloveni Sreçko Katanec (kandidati i përfolur për të marrë drejtimin e Kombëtares), ndodhet në vendin 33-të (+ 5 vende) dhe e konsoliduar në vazon e katërt. Efekti i kësaj përmbysjeje është falë “grushtit” bjellorus, që pas dy fitoreve të bujshme me Shqipërinë (2-4) dhe Holandën (2-1) u ngjit në vendin e 34-t (nga i 43-ti që ishte një muaj me parë) dhe në vazon e katërt, atë që kishte ëndërruar dhe e kishte shumë pranë Shqipëria. Rezultati negativ me skuadrën e Shtanges dhe Hlebit, më 17 nëntor, solli dhe “thyerjen e hundëve” të kuqezinjve, ndërkohë që humbja katastrofike me Rumaninë e Picurkës e Dikës vulosi rrëzimin e Shqipërisë në vendin e pestë në grup, por edhe dorëheqjen e trajnerit Bariç.
TË DYTËT – Shqipëria, me 407 pikë, është e dyta në vazon e pestë, menjëherë pas Bjellorusisë e 37-a me 414 pikë. E vetmja kënaqësi e drejtuesve të FSHF-së pa dyshim është fakti se të paktën kemi lënë pas Slloveninë (e 39-ta), kundërshtarin tonë në grup, ndaj së cilës arritëm dy barazime të bardha si në Shkodër ashtu dhe në Celje. Lista e nëntë ekipeve të vazos “5” plotësohet me Letoninë (vendi i 40-t, 383 pikë), Islandën (41, 380), Armeninë (42, 367), Austrinë (43, 366), Kazakistanin (44, 297) dhe Azerbajxhanin (45, 274).
170 SHTETE
Në total, në shortin e Kampionatit Botëror do të marrin pjesë 170 shtete, nga të cilat vetëm 31 do të fitojnë të drejtën për në fazën finale, që do të zhvillohet në vitin 2010 në Afrikën e Jugut, ku kjo e fundit është e kualifikuar direkt si vend organizator. Faza kualifikuese e Botërorit 2010 (një pjesë e saj ka filluar) do të zgjasë për më shumë se 800 ditë dhe do të përfundojë në nëntor të vitit 2009.
32 FINALISTËT
Italia, kampione në fuqi e Botës, titull i fituar në Kampionatin Botëror 2006, duhet të kualifikohet për të qenë pjesë e 32 finalisteve. Vendet për në fazën finale të “Afrika 2010” janë ndarë në këtë mënyrë: 13 për Europën, 6 për Afrikën (këtu përfshihet edhe vendi organizator), nga 4 për Azinë e Amerikën e Jugut dhe 3 për zonën e Amerikës Qendrore dhe Veriore.
ZONA EUROPIANE
Europa është kontinenti që përfaqësohet me më shumë skuadra në finalet e Botërorit 2010, me 13 të tilla. 53 skuadrat europiane do të ndahen në nëntë grupe. Fitueset e grupeve do të kualifikohen automatikisht, ndërsa tetë të dytat më të mira do të zhvillojnë midis tyre ndeshje plejofi për katër vendet e mbetura. Në zonën europiane bën pjesë edhe Shqipëria.

VAZO A
1. Italia 1498 pikë
2. Spanja 1349
3. Gjermania 1296
4. Çekia 1290
5. Franca 1243
6. Portugalia 1241
7. Holanda 1170
8. Kroacia 1129
9. Greqia 1114

VAZO B
10. Anglia 1113
11. Rumania 1088
12. Skocia 990
13. Turqia 924
14. Bullgaria 877
15. Rusia 861
16. Polonia 855
17. Suedia 853
18. Izraeli 852

VAZO C
19. Norvegjia 827
20. Ukraina 824
21. Serbia 820
22. Danimarka 797
23. Irlanda V. 780
24. Irlanda 731
25. Finlanda 697
26. Zvicra 657
27. Belgjika 600

VAZO D
28. Sllovakia 590
29. Bosnja 585
30. Hungaria 581
31. Moldavia 579
32. Uellsi 560
33. Maqedonia 552
34. Bjellorusia 549
35. Lituania 549
36. Qipro 493

VAZO E
37. Gjeorgjia 414
38. Shqipëria 407
39. Sllovenia 403
40. Letonia 383
41. Islanda 380
42. Armenia 367
43. Austria 366
44. Kazakistani 297
45. Azerbajxhani 274

VAZO F
46. Lihteshtejni 260
47. Estonia 223
48. Malta 183
49. Luksemburgu 127
50. Mali i Zi 65
51. Andorra 57
52. Ishujt Faroe 12
53. San Marino 6

Boterori 2010, Europa “ndahet” në orën 17:00



Të dielën, në orën 16:00 me atë të Shqipërisë (17:00 me atë të Afrikës së Jugut), sytë e botës së futbollit do të drejtohen në Durban ku do të hidhet shorti paraeliminator për Kupën e Botës “Afrika e Jugut 2010”. Sekretari i Përgjithshëm i FIFA-s, Xherom Valske, do të jetë drejtuesi kryesor i ceremonisë së ngjarjes, që do të fillojë me fazën e tretë të shortit të zonës aziatike. Zona e Amerikës Veriore, Qendrore dhe Zona e Karaibeve është e dyta në radhë. Afërsisht pas një ore të procedurës së shortit do të jetë radha e Europës (rreth orës 17:00) për të ndarë 53 ekipet e saj në nëntë grupe kualifikuese. Së fundi, shorti mbyllet me ekipet e zonës afrikane, ku 48 ekipe do të ndahen në 12 grupe me nga katër ekipe.

Procedura e shortit

53 ekipet europiane do të ndahen në 6 vazo: pesë vazo me 9 ekipe dhe një vazo me 8 ekipe të bazuar në renditjen e FIFA-s për muajin nëntor 2007.

Nëntë ekipet e para do të përbëjnë vazon A, nëntë të dytat vazon B dhe kështu me radhë deri në vazon F, e cila do të ketë tetë ekipet e renditura me koeficientin më të ulët të pikëve.

Ekipet do të ndahen në short në tetë grupe me nga 6 ekipe dhe një grup me 5 ekipe për fazën e parë.

Shorti fillon me vazon F dhe mbaron me vazon A. Çdo vazo duhet të zbrazet plotësisht përpara se të tërhiqen ekipet nga vazoja pasardhëse.

Ekipet në vazon F vendosen në pozicionin 6 në grupet nga 1 deri në tetë dhe në të 5-in dhe ato të grupit E në pozicionin 5. Ato të vazos D vendosen në pozicionin 4; të vazos C në pozicionin 3; ekipet e vazos B në pozicionin 2 dhe ekipet e vazos A në pozicionin 1.

Grupet fillojnë të mbushen me grupin 1 dhe mbarojnë me grupin 9.